مين هي مصر...؟
ده سؤال نساله واحنا اللي نجاوب عليه ..
وبعد ما نجاوب نقدر نحدد احنا بنكره مصر ولا بنحبها
مصر مش هي الحكومة ولا الاحزاب ولا الناس
اللي معاها فلوس كثير وعايزه تجيب اكتر ..
امال ايه هي مصر ياعم.....؟
مصر هي الصحيان بدري و الشمس لسة بتفتح
عنيها و النور بيتسرسب من الشيش و اذاعة
القران الكريم طالعة من الراديو ..
هي عربية الفول اللي الناس ملمومين عليها
و بياكلو بمزاج قوي في احلى اصطباحة ، كبايه
الشاي بالحليب على قهوه بلدي الساعه 7 الصبح .
و الواد اللي سايق عجلة وشايل طاولة العيش الساخن
اللي لسة طالع من الفرن وريحته جابت اخر الشارع.
وعم سعيد بيفتح الدكان و بيرش ميه قدامه وبرضه اذاعة
القران الكريم شغاله عنده
و البنت ام مريله كحلي اللي رايحة المدرسة
و العيال الصغيره وشنطة المدرسه قاطمه ضهرهم
وهم متكتفين جوا المريله
البني ام زراير من ورا ( بقوا يلبسوا قمصان دلوقتي )
وبرضه بيجروا ورا بعض وعملين دوشه و تحية العلم
مصر هي الاتنين الشباب الاصحاب قوي اللي ماشين
ع الكورنيش في عز الشتا ومستخبيين جوه الهدوم
التقيله و بقهم بيطلع بخار م السقعة بس واحد فيهم
مطلع ايده م الجاكت و ماسك السيجارة .
مصر هي الرجاله الكبار اللي قعدين يفتكروا ايام زمان
الحلوة ويضحكوا ضحكه ترج النجم على راى الابنودي
و ام امين بتاعة الخضار الى قعدة ع الناصيه من و انا
في ابتدائي . و الشارع الفاضي بالليل اللي مية الشتا
بتلمع عليه وعسكري المرور الواقف ف الشارع من زمان قوي .
مصر هي كل البيوت اللي فتحة على بعضها
و بتحب بعضها من غير مصلحة كل فرح عديت عليه ودخلت باركت و انت
مش عارف اسم العريس و كل عزا دخلته وعملت الواجب فيه مع انك
عمرك ما شوفت اللي مات .
مصر هي كبايه الشاي بالنعناع و انت لابس الجلابيه الصيفي
و قاعد في البلكونه مع نسمه بتهفهف بعد ما اكلت اكله محشي من ايد
الوالدة و بنفسها وحليت بشقتين بطيخ ساقعين في عزالصيف .
مصر سيد درويش وشد الحزام على وسطك و ام كلثوم بالليل
وعبد الحليم لما تحب ومنيب و ام العيال العشرية
ومنير وهو بيصرخ
( يا مصر و انتي الحبيبه .. انتي اغترابي و شقايا
وانتي الجراح الرهيبه .. و انتي الي عندك دوايا )
مصر هي "مولاي اني ببابك قد بسط يدي " الي عايش
بيها النقشبندي لحد دلوقتي وصوت محمد رفعت بيقرا قبل الفطار ف رمضان
و الشيخ الشعراوي اللي بتزعل اول ميقول ( و الى لقاء قادم ان شاء الله )
مصر الابنودي وصلاح جاهين و فؤاد نجم و الشيخ امام و فاروق جويده
و هيكل وفهمي هويدى والشيخ الغزالي فى صلاة العيد و كل الناس الي
بتصلي ورا محمد جبريل في دعوة الحق و باقي الناس الي ورا الشيخ
حاتم في التهجد في القائد ابراهيم وعبد الوهاب مطاوع ف اهرام الجمعة
و كاريكاتير احمد رجب .
مصر وريحة الكبدة و امك بتعملها عشان تفطر اول يوم العيد بعد م تخلص دبح .
و الصيادين اللي واقفين على البحر صيف شتا
بيناغشو السمك .. يمكن يحن ويقب على وش الميه
وسواق التاكسى اللي بتركب معاه وبيحكيلك عن
مشاكله مع ان عمرك ماشفته قبل كدة ولا هاتشوفه بعد كده
و الواد علي اللي بيعدي عم جرجس الشارع وهو خايف عليه
من العربيات و الست الي بتفاصل مع بتاع الخضار علي شلن
زياده في الطماطم
مصر السفر و السهر و الشقا و العشق و المعشوق
بحبك يا بلدي
الأحد يناير 03, 2010 10:20 pm
